發咗一場好得人驚嘅夢

 In 柳川日記


.
話說,天氣忽冷忽熱,見到課室有好多同學因為病而缺席,心諗,幾時到我病呢?六合彩又唔見我咁好彩,琴晚就病啦。
.
.
病咗,自然就瞓得唔好。尋晚發左一場好奇怪嘅夢,搞到我今朝起身之後,都仲有少少驚。
.
.
個故事係咁嘅:
.
.
係修學旅行嘅途中,機緣巧合下,俾我遇到一班有識少少廣東話嘅日本人。佢哋知道我係香港人,就話好想將廣東話學得好啲。 咁,一場緣份,我咪即時教佢哋幾句囉。我話,其實唔使學咁多形容詞,喺香港,幾乎所有形容詞都可以用個「屌」字黎表達。有啲似日文嘅「ヤバい( ya ba i )」嘅意思。不過,用嘅時候,最好就睇一睇個對象同埋個環境。
.
.
跟住,有個日本人問我,「仆街」其實係咩意思。我就同佢講,某程度上,呢個字都係一種形容詞。將「死啦」同「大鑊啦」呢兩個感覺合併,就應該係等於「仆街啦」嘅意思。 啲同學都好開心,好似解咗一個多年嘅心結咁。我見到佢地熱烈咁討論,研究係咩情況下可以講「仆街」呢個詞,我個心入邊感到好溫暖,好開心。
.
.
點知,呢個時候,突然有幾個着住解放軍衫嘅男人,衝入黎餐廳,將我捉走咗。 之後,我係一間好似廉政公署請人飲咖啡個啲房入面,被幾個中國大使館嘅人盤問。佢哋係咁問我「是不是教日本人說髒話!?」。我唔知邊度嚟嘅勇氣,大大聲咁回應佢,「食屎啦你!我教嗰啲叫廣東話啊!」。
.
.
最後,佢哋聯絡特區政府,將我遣返香港。仲好搞到我張護照以後都入唔到日本國境。
.
.
呢一場夢,我淨係記得上面個啲咋。 唉,真心希望,唔會「夢想成真」啦。
.
.
係啦,可能,有啲人會話上面個啲係「粗口」,係一啲唔好嘅詞語。咁,我又覺得,咁樣標籤法,只會搞到越黎越少人用。其實,好多時候,呢啲都係發揮緊「語氣詞」或者「形容詞」嘅功能。係廣東話嘅其中一種精華所在。 美國人,依然會SHITSHIT聲,大陸人都會操操操,台灣人就係幹幹幹。唔同,我地香港人,過多10年後,真係個個都講「好可惡」咩?
.
.
到底咩先叫粗口?我覺得,羞辱別人嘅說話,先至係粗口。所以,我啲學生,好少會話我啲粗口「難聽」。因為,我用黎用去都係喺度描述各類嘅情感,或者輔助表達語氣。
.
.
語言,唔用就唔會進步。少咗人用,就會被淡化,甚至慢慢被遺忘。廣東話,,也都唔會例外。
.
.
有時見到網上面啲人分享一啲嘢,話咩「日本人學廣東話學得好純正」,話咩「外國人教內地人廣東話同普通話嘅分別」,話咩「日劇入邊有角色清楚地指出廣東話係獨特嘅語言」,等等。跟住,大家就會話「好開心」,因為覺得「廣東話」受到尊重。
.
.
真係咁咩? 我唔係咁諗。
.
.
因為,有時候我係堂上講某啲字眼,有啲學生呈現嘅反應,真係會令我懷疑自己係唔係去咗佛堂度教日文。
.
.
最後,放心啦各位家長。我係唔會教小朋友嘅班㗎。這課程我有份監督,不過,都係修改下筆記,研究下教材㗎咋。所有小朋友嘅班,都係有充滿愛心嘅日籍女老師教授。所以,放心報名啦(笑)。

Recent Posts
Contact Us

We're not around right now. But you can send us an email and we'll get back to you, asap.

Not readable? Change text. captcha txt